آج بھی اس بیان پر قائم ہوں کہ 262 پائلٹس کی ڈگریاں مشکوک تھیں، غلام سرور

انکوائری بورڈ نے مجھے جو نمبرز دیئے وہی میں نے ایوان اور کابینہ میں پیش کیے، 161 لوگوں کو شوکاز نوٹسز جاری ہوئے، 262 میں سے 28 پائلٹس کو نوکریوں سے برطرف کیا گیا، وفاقی وزیر برائے ہوا بازی

اسلام آباد( تازہ ترین اخبار-22جولائی2020ء) آج بھی اس بیان پر قائم ہوں کہ 262 پائلٹس کی ڈگریاں مشکوک تھیں۔ نجی ٹی وی چینل پر گفتگو کرتے ہوئے وفاقی وزیر برائے ہوا بازی غلام سرور کا کہنا تھا کہ میں آج بھی اپنے بیان پر قائم ہوں۔ بات کرتے ہوئے ان کی جانب سے کہا گیا ہے کہ انکوائری بورڈ نے مجھے جو نمبرز دیئے وہی میں نے ایوان اور کابینہ میں پیش کیے، 161 لوگوں کو شوکاز نوٹسز جاری ہوئے، 262 میں سے 28 پائلٹس کو نوکریوں سے برطرف کیا گیا۔

جعلی ڈگریوں سے متعلق جو اعدادوشمار ہمارے پاس تھے، وہی سپریم کورٹ میں جمع کروائے گئے۔ وفاقی وزیر ہوا بازے کے مطابق سول ایوی ایشن کے لائسنس درست تھے لیکن ان کو حاصل کرنے کا طریقہ درست نہیں تھا، اگر جعلی لائسنس بنے تو اس کا ذمہ دار سول ایوی ایشن ہے۔

وفاقی وزیر کا کہنا تھا کہ ہم نے بیوروکریسی میں بھی صفائی کرنے کا عزم کیا ہوا ہے، ان تمام افراد کو بھی اپنا حساب دینا ہو گا۔

یاد رہے کہ وفاقی وزیر ہوابازی غلام سرور خان نے کہا تھا کہ ایک سال چار ماہ کی فرانزک انکوائری کے بعد 262پائلٹس کی ڈگریاں مشکوک قرار دی گئیں، مختلف ایئر لائنز کے 102 پائلٹس گراونڈ کردیئے، اب تک متعدد کے خلاف ایکشن لے لیا گیا ہے، اپنی جگہ دوسروں کو امتحان دینے والے 26کے خلاف ایکشن لے رہے ہیں‘ اب تک 34کو لائسنس معطلی کے نوٹس بھیج دیئے،غیر ملکی ایئر لائنز میں کام کرنے والے پاکستانی پائلٹس کے خلاف بھی تحقیقات کررہے ہیں ، متحدہ عرب امارات ایئر لائن کے 54پائلٹس میں سے 48کلیئر ہوگئے ‘ ویت نام ایئر لائن والے 11 سے 9 کلیئر ہوگئے ، بحرین ایئرلائن کے 4 میں سے 2 کلیئر ہوگئے، ملائشیا اور ترک ایئر لائن میں کام کرنے پاکستانی پائلٹس پر تحقیقات کررہے ہیں۔

تاہم پائلٹس کی معطلی اور لائسنس منسوخی کا سلسلہ جاری ہے، اسی دوران وفاقی وزیر برائے ہوا بازی غلام سرور کی جانب سے کہا گیا ہے کہ آج بھی اس بیان پر قائم ہوں کہ 262 پائلٹس کی ڈگریاں مشکوک تھیں۔