کرونا وائرس کے باعث لاہور کے 10 علاقے خطرناک قرار، مکمل سیل کر دیا گیا

پنجاب کا دارالحکومت ملک کا سب سے زیادہ متاثرہ شہر بھی قرار، اب تک 800 سے زائد کیسز سامنے آ چکے

لاہور (اُردو پوائنٹ اخبارتازہ ترین۔ 11 اپریل2020ء) کرونا وائرس کے باعث لاہور کے 10 علاقے خطرناک قرار، مکمل سیل کر دیا گیا، پنجاب کا دارالحکومت ملک کا سب سے زیادہ متاثرہ شہر بھی قرار، اب تک 800 سے زائد کیسز سامنے آ چکے۔ تفصیلات کے مطابق ملک میں کرونا وائرس کا پہلا کیس 26 فروری کو رپورٹ ہوا تھا، جس کے بعد سے اب تک کل 4900 کیسز رپورٹ ہو چکے ہیں، جبکہ 77 افراد جان کی بازی ہار چکے۔

ابتداء میں کرونا وائرس کے باعث سندھ کا صوبہ سب سے زیادہ متاثر ہوا تھا۔ ملک میں کرونا وائرس کیسز کی سب سے زیادہ تعداد ایران سے واپس آنے والے زائرین کی رہی۔ تاہم بعد ازاں مقامی سطح پر وائرس پھیلنے لگا اور اب صوبہ پنجاب کرونا وائرس سے سب سے زیادہ متاثر ہونے والا صوبہ بن چکا ہے۔ پنجاب میں کرونا وائرس کے 24 سو سے زائد کیسز رپورٹ ہو چکے ہیں۔

صوبے کا دارالحکومت لاہور کرونا وائرس سے سب سے زیادہ متاثر ہونے والا شہر ہے، جہاں اب تک 800 سے زائد کیسز رپورٹ ہو چکے۔ جبکہ شہر کے 10 علاقوں کو خطرناک قرار دے کر سیل کر دیا گیا ہے۔ جن علاقوں کو سیل کیا گیا ہے ان میں رائیونڈ، چاہ میراں، سکندریہ کالونی، بیگم کوٹ شاہدرہ، رستم پارک گلشن راوی، مغل پورہ ریلوے کالونی، سمال انڈسٹری ہاوسنگ کالونی، کینٹ، ڈیفنس بی اور بیدیاں روڈ شامل ہیں۔

ان علاقوں میں لوگوں کی نقل و حرکت، داخلے و اخراج پر مکمل پابندی عائد کر دی گئی ہے۔ اس تمام صورتحال کے حوالے سے پنجاب کی وزیر صحت ڈاکٹر یاسمین راشد نے کہا ہے کہ پنجاب میں کرونا وائرس کے متاثرہ افراد کی تعداد تشویشناک نہیں، ایک کروڑ دس لاکھ کی آبادی کے صوبہ میں مہلک وائرس سے صرف 19 اموات ہوئیں جو مغربی ممالک کی نسبت بہت کم تعداد ہے ۔

اب تک 31535مشتبہ افراد میں سے صرف2414میں کرونا کی تشخیص ہوئی 1467کو قرنطینہ میں رکھا گیا جو زیادہ تر زائرین یا تبلیغی جماعت سے تعلق رکھتے ہیں جن سے مختلف سٹریٹجی کے تحت نمٹا جارہا ہے۔ صوبائی وزیر صحت نے کہاکہ صوبہ کے مجموعی متاثرہ افراد میں 811 کا تعلق لاہور جبکہ اس کے بعد دیگر کا تعلق گجرات اور راولپنڈی سے ہے اور ان میں سے زیادہ تر مریضوں کی سفری تاریخ ہے۔ صوبائی حکومت نے کرونا وائرس سے نجات کیلئے 8 فیلڈ ہسپتال قائم کئے ہیں ۔ وزیر صحت کہتی ہیں کہ یہ بات قابل اطمینان ہے روزانہ تین تا چار متاثرہ مریض صحت یاب ہو کر گھروں کو جارہے ہیں ۔