نیب میں پیش نہ ہونے پر شہبازشریف گرفتار ہو سکتے ہیں

قومی احتساب بیورو کیخلاف آج عبوری ضمانت لینا تھی، مگر کاز لسٹ میں شہبازشریف کا نام نہ آیا

                            

لاہور( اخبار تازہ ترین 2 جون 2020ء ) نیب میں  پیش نہ ہونے پر سابق وزیراعلیٰ پنجاب شہبازشریف  گرفتار ہو سکتے ہیں۔ دنیا نیوز کے مطابق لاہور شہبازشریف کو آج ہر صورت نیب میں پیش ہونا ہوگا ورنہ انہیں گرفتار کیا جا سکتا ہے۔ شہبازشریف کو نیب کیخلاف آج عبوری ضمانت لینا تھی۔ مگر لاہور ہائیکورٹ میں نیب کیخلاف عبوری ضمانت کیلئے شہباشریف کا کاز لسٹ میں نام نہ آیا۔

یہ بات بھی قابل غور رہے کہ قومی احتساب بیورو سابق وزیراعلیٰ شہبازشریف کو پہلے کئی بار طلب کر چکا ہے۔ آمدن سے زائد اثاثہ جات اور منی لانڈرنگ کیس میں شہباز شریف کو آج نیب نے طلب کر رکھا ہے ، لیگی صدر پر بیویوں کے نام پر جائیداد بنانے کا الزام ہے اور نیب کی جانب سے اکاؤنٹس میں مختلف ٹرانزیکشنز سے متعلق پوچھ گچھ ہوگی۔

خیال رہےلاہور ہائیکورٹ میں سابق وزیر اعلی پنجاب و مسلم لیگ ن کے صدر شہباز شریف نے آمدن سے زائد اثاثوں اور منی لانڈرنگ کیس میں عبوری ضمانت کیلئے درخواست دائر کر دی ہے، شہباز شریف  نے ضمانت کی درخواست  امجد پرویز ایڈووکیٹ کی وساطت سے  درخواست دائر کی ہے  جس میں چیئرمین  نیب سمیت دیگر کو  فریق بنایا گیا ہے، درخواست میں موقف  اختیار کیا گیا ہے  کہ 1972ء میں بطور تاجر کاروبار کا آغاز کیا اور  ایگری کلچر، شوگر و ٹیکسٹائل انڈسٹری  میں اہم کردار  ادا کیا۔

سینئیر صحافی عارف حمید بھٹی  نے اس حوالے  سے انکشاف کیا ہے تھا کہ   نیب کی  ایک اہم شخصیت نے سابق  وزیراعلیٰ پنجاب اور اپوزیشن  لیڈر میاں شہباز شریف کو پیغام بھجوایا کہ انہیں آئندہ ہفتے گرفتار کیا جائےگا جس کے بعد ہی میاں شہباز شریف نے عدالت سے رجوع کیا ہے۔